താഴോട്ടെണ്ണൽ

നൂറാളു താഴ്ചയിൽ മണ്ണിന്നടിയിലും

നൂറുമാറാഴത്തിൽ സാഗരത്തിങ്കലും

എണ്ണുന്നതുണ്ടവൻ താഴേയ്ക്കു പത്തു തൊ-

ട്ടിട്ട് പൂജ്യം വരെയോരോ നിമിഷവും.

പുകയിലപ്പൈപ്പു കെടായ്കിൽ നിരന്തരം

അരമണിക്കൂറെൻെറ ചുണ്ടിലെരിഞ്ഞിടും,

മുപ്പതാണ്ടും കൂടിയെൻെറ ശിരസ്സൊരു

പ്രശ്നവമില്ലാതിരുന്നിടും പന്തിയായ്.

ഭിത്തിയിൽ ഞാനടിച്ചീടുന്നൊരാണി ഹാ

ഭദ്രമായ് നിൽക്കുമിരട്ടി നാൾ നിശ്ചയം.

ഞാനിവിടെയെഴുതുന്നതു, തീ പിടി

ച്ചീലയെങ്കിൽ, തുലോം മഞ്ഞച്ചു മഞ്ഞച്ചു

യാതൊരാളും തന്നെ വായിച്ചിടാതെ നി-

ന്നീടുമേറെക്കാലമെന്നതും സത്യമാം.

നൽക്കരിങ്കല്ലിൽ പണി തീർത്ത വാതിലും

അത്ര വേഗം പൊടിഞ്ഞില്ലാതെയായിടാ.

എല്ലാറ്റിനേക്കാളുമേറെ - കടൽ, കര

പായൽ പിന്നെച്ചിലാഭൗമസങ്കേതവും

മാറ്റുകിൽ - ഏറെ നാൾ ജീവിച്ചു പോവതു

മർത്യനത്രേ ക്ഷിതിയിങ്കൽ നിസ്സംശയം.

എത്ര നാൾ? ആഴങ്ങളിലെ വിനാഴിക

പത്തു തൊട്ടിങ്ങു പൂജ്യം വരെ കീഴ്പ്പോട്ടു

വിണ്ണിലിരിക്കുവോൻ എണ്ണിയെത്തും വരെ.