ആയിരം രൂപങ്ങളിൽ

ആയിരം രൂപങ്ങളിൽ നീയൊളിക്കിലും

ആയതനേത്രേ, തിരിച്ചറിഞ്ഞീടുവൻ,

മായികമൂടുപടമണിഞ്ഞീടിലും

മാനിനി നിന്നെത്തിരിച്ചറിഞ്ഞ‍‍‍‍‍‍ീടുവൻ,

സൈപ്രസ് മരത്തിൻ പവിത്രതയിൽ, പൂർണ്ണ

യൗവ്വനത്തിൻെറ വളർച്ചാശ്രമങ്ങളിൽ

സർവ്വദാ വർദ്ധിതസൗന്ദര്യധാമമേ,

നിന്നെ തിരിച്ചറിഞ്ഞീടുവൻ നിശ്ചയം.

നിർമ്മല നീർച്ചാലലകൾ തൻ ചൈതന്യ

ധാരയിൽ നിന്നെ തിരിച്ചറിയുന്നു ഞാൻ.

സർവ്വാഭിനന്ദിതേ, ക്രീഡാവതീ, ജല-

ധാരയുയർന്നു ചീറ്റിപ്പതിക്കേയതി

ഹർഷമായ് നിന്നെ തിരിച്ചറിയുന്നു ഞാൻ.

മേഘശകലങ്ങളംബരത്തിൽ ബഹു

രൂപമായ് മാറി മറയുന്ന വേളയിൽ

ഭിന്നവർണ്ണപ്രഭാപുഞ്ജമേ, ഞനതിൻ

ഭംഗിയിൽ നിന്നെ തിരിച്ചറിയുന്നിതേ

പൂവ്വിടും പുൽമേടയിൽ തുഷാരാവൃത

കംബളം നീളേ വിരിക്കുന്ന വേളയിൽ

സർവ്വതാരാഖചിതാഭയിൽ, നിൻ മനോ-

ഹാരിതയല്ലോ തിരിച്ചറിയുന്നു ഞാൻ.

ആയിരം കൈകളാ,ലൈവീലത പടർ

ന്നാലിംഗനം ചെയ് വതു കാൺകെയക്ഷണം

സർവ്വചരാചരാശ്ലേഷസന്തുഷ്ടയാം

നിൻെറ സാന്നിധ്യം തിരിച്ചറിയുന്നു ഞാൻ..

പൂർവ്വാചലത്തിൻെറയഗ്രത്തി,ലത്ഭുതം,

തീ പൂട്ടിടുവാനുഷസ്സൊരുങ്ങീടവേ,

സ്വാഗതമോതാം നിനക്കു സർവ്വോന്മേഷ

ദായിനീ, പിന്നെ,യെൻമേലേ വിഹായസ്സു

നിർമ്മലമാമൊരു ഗോളം ചമയ്ക്കവേ,

വിസ്തൃതഹൃത്തടമാർന്നു ശ്വസിപ്പു ഞാൻ

നിത്യവും നിന്നെയെന്നുള്ളിലേയ്ക്കെൻ പ്രിയേ.

ബാഹ്യേന്ദ്രിയങ്ങൾ വഴി കിട്ടിടുന്നതും

ആന്തരനേത്രത്തിലൂടെ ലഭിപ്പതും

എൻ്റെയധ്യാപികേ, നിന്നുലൂടല്ലയോ

എല്ലാമറിവുമെൻ ചിത്തേ ഭവിപ്പതും.

അല്ലാഹുവിൻെറ സഹസ്രനാമങ്ങൾ ഞാൻ

ചൊല്ലി വിളിക്കെ,യോരോ പേരിലും മുഴ-

ങ്ങുന്നൂ നിനക്കായൊരു നാമമെപ്പൊഴും.